Yn y mis sy’n nodi pen-blwydd geni a marwolaeth Shakespeare, mae Stiwdio Clwyd yn gyffrous i weithio gyda’r Ymarferydd Shakespeare Clare-Louise Rhys-Jones ar gyfres o Gampfeydd Actorion Shakespeare.
Bydd y gyfres hon o weithdai, dan arweiniad yr ymgeisydd PhD (Sefydliad Shakespeare) Clare-Louise, yn cael eu cynllunio mewn ymgynghoriad â’r Rhwydwaith Artistiaid Lleol. Caiff manylion terfynol eu rhannu cyn pob gweithdy.
Ydych chi’n gyfforddus gyda chomedi ond yn ofni trasiedi? Am wybod pam? Ydych chi am arbrofi gyda monolog neu ddeialog? Beth bynnag yr hoffech eu profi yn y gweithdai hyn, cysylltwch i ddarganfod sut allwch chi helpu i lunio cynnwys y gweithdy.
P’un a ydych chi’n newydd i Shakespeare neu’n weithiwr proffesiynol profiadol, mae croeso mawr i chi gymryd rhan yn y gweithdai a’r prosiect ymchwil ehangach.
Mae’r gweithdai hyn yn rhan o brosiect ymchwil, sy’n cael ei gynnal ar hyn o bryd gan Clare-Louise, fel rhan o’i lleoliad a ariennir gan M4C yn Stiwdio Clwyd. Mae hi’n ymchwilio i sut y gall theatrau rhanbarthol gefnogi actorion a chyfarwyddwyr orau mewn datblygiad proffesiynol sy’n seiliedig ar Shakespeare.
Mae Clare-Louise yn ymarferydd theatr gyda dros ugain mlynedd o brofiad. Graddiodd o LIPA yn 2001, a rhwng 2002 a 2021, rhedodd ei chwmni theatr ei hun yng Ngogledd Cymru. Rhedodd Clare-Louise nifer o theatrau ieuenctid a chyflwynodd weithdai ledled Gogledd-ddwyrain Cymru, Swydd Amwythig, a’r ardaloedd cyfagos, gan gynnwys fel rhan o dîm Theatr Clwyd.
Er 2012 mae ei hymarfer wedi canolbwyntio ar fonolog Shakespeare, wedi’i ysbrydoli gan y ffaith bod llawer o’i myfyrwyr ei hun yn wynebu clyweliadau ysgol ddrama a ail-daniodd ei hangerdd bersonol dros Shakespeare. Yn 2016 cynhyrchodd a chyfarwyddodd Ŵyl Shakespeare i nodi 400 mlynedd ers ei farwolaeth. Daeth hyn â nifer o theatrau ieuenctid ynghyd ar gyfer pythefnos o berfformiadau seiliedig ar Shakespeare a arweiniodd at gynhyrchiad awyr agored o A Midsummer Night’s Dream ar dir Castell y Waun. Yn 2021, dechreuodd astudio MA llawnamser mewn Shakespeare a Theatr yn Sefydliad Shakespeare yn Stratford-upon-Avon, ac mae wedi bod yn hyfforddi actio Shakespeare ers iddi raddio. Mae Clare-Louise bellach yn ymgeisydd PhD llawnamser, a ariennir gan M4C yn Sefydliad Shakespeare. Mae ar hyn o bryd yn ei thrydedd blwyddyn o ymchwilio i ddefnydd Shakespeare o rethreg a rennir mewn deialog.
Mae ei lleoliad ymchwil yn Theatr Clwyd yn nodi dychweliad cyffrous i’w gwreiddiau, ac yn archwilio’n fanwl sut y gall theatrau rhanbarthol gefnogi eu hactorion a’u cyfarwyddwyr lleol i ddatblygu eu harferion Shakespeareaidd.
