Mae Ysgrifennu Gyda… yn sesiwn waith gymunedol ar-lein i feithrin creadigrwydd, neilltuo amser i fod yn ddramodydd a dal eich hun yn atebol i’ch nodau fel dramodydd proffesiynol.
Gallwch ymuno â ni gartref, ar y trên, mewn caffi – unrhyw le ble gallwch chi neilltuo gofod ac amser i ysgrifennu.
Nid yw’r sesiynau hyn yn gyfle i rannu gwaith, derbyn adborth ar eich gwaith na chyflwyno syniadau i Theatr y Sherman na Theatr Clwyd – mae’n gyfle i ganolbwyntio ar y broses o ysgrifennu, creu cymuned a dod o hyd i gefnogaeth gyda dramodwyr eraill.
Wedi’i noddi gan Character 7, Gwobr Verity Bargate yw prif wobr ysgrifennu newydd Soho Theatre, gyda’r ddrama fuddugol yn cael ei chynhyrchu mewn cynhyrchiad llawn ar ei llwyfannau.
Am y wobr, dywedodd Soho Theatre:
“Mae’r wobr yma ar gyfer pawb. Ysgrifenwyr am y tro cyntaf, pobl sy’n dechrau arni’n hwyr, pobl sydd wedi bod yn eistedd ar syniad ers blynyddoedd. Dydyn ni ddim yn poeni am eich cefndir chi na’ch cymwysterau – dim ond eisiau drama wych. Os ydych chi yn y DU neu Iwerddon a bod gennych chi stori sy’n llosgi twll yn eich ymennydd chi, rhywbeth brys neu ddoniol neu ddinistriol sydd ddim yn gadael llonydd i chi, anfonwch hi aton ni. Dim ond syniad gwych, llais beiddgar, a’r dewrder i’w roi ar bapur.
Wedi’i lansio yn 1982, mae Gwobr Verity Bargate yn un o’r gwobrau sydd wedi’i sefydlu hiraf yn y DU ac mae’n anrhydeddu Verity Bargate, cydsylfaenydd Soho a hyrwyddodd ysgrifennu newydd yn angerddol yn ystod ei chyfnod gyda’r cwmni theatr ymylol bach ond hynod ddylanwadol, Soho Poly. Yn 2022 dathlodd Gwobr Verity Bargate ei phen-blwydd yn 40 oed.”
Mae’r ceisiadau ar gyfer Gwobr 2026 yn agor ar ddydd Llun 12 Ionawr ac yn cau ar ddydd Llun 13 Ebrill.
Ymunwch â Soho Theatre ar gyfer gweithdy ysgrifennu newydd ar gyfer dramodwyr sy’n dod i’r amlwg. Mae’r sesiwn yma’n cynnig adnoddau ac ysbrydoliaeth i gyfranogwyr ddechrau ysgrifennu drama ac yn annog awduron am y tro cyntaf i gymryd eu camau cyntaf at ysgrifennu dramâu.
Beth i’w ddisgwyl
Dod i ddeall rhaglenni cyfredol Soho Theatre, ei mannau theatr a’i dull unigryw o adrodd straeon a gweithredu’n theatrig.
Yn rhan gyntaf y gweithdy, bydd cyfle i ddysgu am Wobr Verity Bargate a gwaddol Soho Theatre o ysgrifennu newydd.
Yn yr ail ran, cewch archwilio rhinweddau a chyfyngiadau posibl confensiynau dramatig, gan ddarganfod sut maen nhw’n siapio naratif ac yn ymgysylltu â chynulleidfaoedd.
Yn olaf, bydd y cyfranogwyr yn edrych ar samplau sgript o ddramâu sydd wedi cael eu rhaglennu gan Soho Theatre ac yn cael gwybodaeth am y technegau sy’n cael eu defnyddio gan ddramodwyr i swyno cynulleidfaoedd a chyfoethogi eu harfer ysgrifennu eu hunain.
